Ek Nazar Is Taraf Bhi. .

Urooj madrassay main mazhabi taleem laynay jaya krti thi, ek din usay mazhab k rakhwalay nay kisi bahanay say chutti k dauraan rok liya aur apni hawis ka nishana banaya. Is larki nay apnay maa baap ko iss baray main bataya magar wo log dabay dabay  ehtejaaj kay siwa us shakhs kay sath  kuch na kar sakay, aur wo larki kuch arsay baad iss ghum say maut kay mou main chali gae

Ye kahani kisi ek larki ki nahien, madaaris aur school mein aaye  din iss tarha kay waqiyat daikhnay aur sun’nay mein atay rehtay hain, jin ko hum ek kaan say sunn kr doosray kaan say nikal dayte hain, ye sochay bina kay ek bach’chi ya bach’chay ki poori zindagi tabah hojati hai.

Ek survey report k mutabiq zeyadah tar larkiyan is darindagi ka be-daraigh  nishana ban rahi hain, jo ke 18 saal say kum umr hoti hain. 2011 mein  iss tarha ke waqiyat jo reports darj karaaye ga’ien un mein sb say zeyadah tanaasub larkiyun ka tha. Agar hum soobaye  bunyaad  par in cases ki jaanch partaal karein tou sab say zeyadah andoornay Sindh mein ye waqiyaat ronuma hotay hain, us k baad KPK phir Balochistan aur uss kay baad Islamabad sar-e-fehrist hai. Agar statistics ko daikhain tou pichlay saal iss tarha k waqiyat main 25% izafa daikhnay main aaya hai. Dawn news paper kay ek survey report  k mutabiq 2.27%.2010 mein 2,255 jab kay 2011 mein 2303 cases report huey.  Aur in waqiyat ki  sharah mein taizi say  izafa horaha  hay. Inn cases ki theek tadaad ka andazah karna is liye bhi  mushkil hai kiyun kay zeyadah tar afraad apni izzat ko bachanay ki khatir police stations  mein report darj he nahi karwatay, jab k ye amal darindagi ko barhawa day raha hai, aur mujrim ab baghair kisi darr k apni darindah sift kaarwaiyan karnay mein mashghool hain

Sirf rape cases he nahi tadreesi idaron main bachon ko jismani or zehni aziat dena bht aam si baat hogai hai jiska notice khud in bachon ke maa baap bhi nahi letey jiski wajah se wo farsuda khayalat hain jo k humaray zehno mai jar pakar chukay hain k asatiza ko haq hai k wo unko perhai k doran marr bhi saktay hai khwah wo kitni hi bedardi se q na marain ,un sey poochneu wala koi nahi jab k is tarah ki jismani or zehni aziat deny ki hunmara mazhab  khud  mazammat  kerta  hai .

Ab agar hum baat kerain bachon oer in runuma honay waley waqiat k asarat ki kistarah unkey kachey or masoom zehan asar andaz horahy hain  ,unko apni aanay wali zindagi mai kistarah k masail ka samna hota hai ?? is tarah k bachay musalasal zehni aziat ka shikar rehty hain , unka muashrey per se aitmad khtam hojata hia , kisi had tak wo benaam dar or khof ka shikar rehny lag jatey hain or muashrey mai apna kirdar theek se nibah nhi patey .

Ab zarorat is amr ki hai key ala satah per is trah k intizamat kiye jaien k in waqiat ki rok tham ki jasakey , kitabon k zariye bachion ko shaoor or agahi di jaye , ghar k barey afraad school or madaris janey waley bachon k sath dostana taluqat ustwar karein or unhain  aitemad main laity huey  unsey rozana ki  karkerdagi poochain  or zra sab hi koi shuba  ho to foran notice lain . is tarah karney se bachon or ghar k baron k dermiyan khla kam hoga to khud he is tarah k waqiat mai kami ronuma hogi .

By:          

Tayyaba Babar